Is aistriúchán í an fhoirm Ghaeilge.

Ainmneacha stairiúla:
B’ann do chúpla logainm stairiúil timpeall ar bf Nutgrove an lae inniu. Ar léarscáil an Down Survey léirítear áit bheag 1655 ‘faranclinkin’ gar do theorainn thuaidh an bhaile fearainn — ach sa chuid thiar theas de bf An Cheapach Bheag (#28545) chomh fada agus is féidir a dhéanamh amach. Pléitear an logainm sin faoi bf Baile Mhic Giolla Chaoin (#28630) i bpar. Raoire Mór.

Ach is cosúil ar dheontais an 17ú haois agus ar leagan amach na mbailte fearainn go mb'fhéidir gurb ionann bf Nutgrove an lae inniu agus an áit darbh ainm 1629 ‘Garrygallridd’, et var., a luaitear sna foinsí, go minic i dteannta le bf An Rinn (#28644) lastoir.

Is cosúil gur gaelú ar ainm Angla-Normannach atá le feiscint in 1593 ‘Garrigallared’, 1607 ‘Garrygallaraide’, 1607/8 ‘Farengallarard’ [sic, ‘Faren-’], 1608 ‘Garrygallaruid’, 1629 ‘Garrygallridd’, 1639 ‘Gallagaleid’, 1660c ‘Garrigallrie’. Cf. 1547 ‘Gallrowtheston’, 1654 ‘Gallretts towne’ > bf Baile Gallrath/Gollierstown (#17143) i gContae Bhaile Átha Cliath, agus féach freisin bf Galrastún/Galroostown (#34095) i gContae Lú. Cf. 1299 ‘…son of Galrath’ CJR I 253 i gContae Bhaile Átha Cliath. Is cosúil gurbh ann don ainm Galrid ag na Sean-Ghall, ar mhalairt foirme é de Galfrid na nAngla-Normannach; dhealródh sé gur Garraí Gallraid (?) “the garden of Gallraid” atá anseo.

Tá an teach mór féin .i. Nutgrove SO thar an teorainn sa bhaile fearainn teorantach bf An Rinn (#28644).

Níl sé as an áireamh ar fad gur bréagaistriúchán é Nutgrove féin ar fhoirmeacha béarlaithe déanacha den logainm stairiúil Garraí Mhic Dhonncha “the garden of Mac Donncha” > 1607 ‘Garricanachoe’, 1612 ‘Gary Donogh’, 1617 ‘Garriconagha’ ... 1662 ‘Garryconnagh’ mar a bheadh *Garraí Cna “garden of nuts” ann (féach FGB s.v. cna, cná; féach nóta faoi bf Míleac (#28550) laistiar). Cf. an bréagaistriúchán bf Drom Chonóra > Nutfield (#6058) i gContae an Chláir.