Coilleach 'áit choillteach' atá sa logainm Coxtown ó cheart. Féach ar na foirmeacha stairiúla atá bailithe i logainm.ie (faoi uimh. thag. 50453): Culech (1302), Quillaghmore (1624), Culliaghmore, -beg otherwise Cockstown (1794) srl. Is amhlaidh a tugadh Cockstown sa sampla romhainn agus Coxtown ina dhiaidh sin ar an logainm i mBéarla de dheasca míthuisceana. Ní hannamh a fhaightear aistriúcháin mhíchruinne den chinéal sin i leaganacha Béarla logainmneacha, leithéid Trouthill / An Cnoc Breac i Maigh Eo.
Tá áiteanna eile den ainm Coilleach ar fud na tíre agus go deimhin tá an focal céanna sa ghinideach, in ainmneacha mar Maigh Coillí i gCill Chainnigh. Ba dheacair *Coileach (logainm neamhspleách) a mhíniú go sásúil, i gcead don Phaorach.